Një sulm fizik raportohet të ketë ndodhur sot në Skenderaj.

Bëhet fjalë për një sulm fizik nga kryetari i Skenderajt, Sami Lushtaku në drejtim të kryetarit të Vetëvendosjes në këtë komunë, Hysni Mehani.

Kjo është bërë e ditur nga vetë Mehani, përmes një postimi në Facebook. E pas deklarimit të Mehanit ka reaguar edhe vetë kryetari i Skenderajt, Sami Lushtaku.

Lushtaku tha se pushteti i Kurtit e quajti “Sami Serbia”, e këtë s’e lejuan qytetarët.

“Pushteti i Albin Kurtit përmes mekanizmave të tij tentoi që sot të më sulmoi në Skenderaj. E kam një jetë në shërbim të vendit, kurse etiketat si “Sami Serbia” qytetarët nuk i tolerojnë më, prandaj edhe reaguan”, shkruan Lushtaku në reagim.

Kurse nga Lëvizja Vetëvendosje kanë publikuar edhe një fotografi të Hysni Mehanit.

Në reagimin e VV-së thuhet se është sulmuar brutalisht kryetari i Degës në Skenderaj si dhe kandidati për deputet nga kjo parti, Hysni Mehani.

Zv/ministri në detyrë Mehani thuhet e ishte në kafiterinë “Solo” derisa po pinte kafe me ish-deputeten Arjeta Fejza.

Po ashtu u tha se Mehani aktualisht po merr trajtim mjekësor.

Në lidhje me rastin nuk ka pasur ende ndonjë deklarim nga Policia e Kosovës./Lajmi.net/