Vjosa Osmani dhe Lumir Abdixhiku kanë nisur një platformë të re komunikimi me qytetarët, të quajtur “Hajde Folim”, në kuadër të aktiviteteve për zgjedhjet e 7 qershorit.

Osmani, si kandidate për presidente, dhe Abdixhiku, si kandidat për kryeministër nga Lidhja Demokratike e Kosovës, gjatë ditës së djeshme kanë qëndruar në Kurriz të Dardanisë, ku kanë bashkëbiseduar me qytetarë për tema dhe shqetësime të ndryshme.

Përmes një postimi, Abdixhiku tha se synimi i kësaj platforme është që politika të jetë më afër njerëzve dhe problemeve të tyre të përditshme.

“Në çdo qytet, në çdo shesh, duam të ulemi pranë qytetarëve e të flasim hapur për jetën e tyre, për brengat, zhgënjimet, shpresat dhe idetë e tyre për vendin”, ka shkruar ai.

Sipas Abdixhikut, Kosova ka nevojë për më pak propagandë dhe më shumë dëgjim të qytetarëve.

“Më pak zhurmë e më shumë kuptim. Dhe pikërisht prej këtyre bisedave duam ta ndërtojmë rrugëtimin tonë të përbashkët përpara”, ka shtuar ai, duke ftuar qytetarët të marrin pjesë edhe në aktivitetet e ardhshme të platformës “Hajde Folim”. /Lajmi.net/