Pas dështimit të mbledhjes së sotme të kryesisë së Kuvendit të Kosovës, kryetarja Albulena Haxhiu, është pyetur për çështjen e pagave kalimtare të cilat po i marrin deputetët e legjislaturës së fundit.

Haxhiu tha se për këtë çështje tashmë ka një ligj, por sipas saj, nuk ka kuptim që një deputet të mos jetë as 6 muaj deputet dhe në anën tjetër të marrë pagë kalimtare.

“Jam shumë e gatshme në të ardhmen që nëse ka iniciativa që dëshirojnë t’i ndryshojnë këto rregullime ligjore që ne i kemi gjetur prej kohësh këtu, jemi shumë të hapur t’i diskutojmë. Mund të marrim praktika të ligjeve të tjera. Nëse si kryetare e kuvendit nuk je në këtë mandat për më shumë se 6 muaj, nuk mund t’i gëzosh privilegjet e kryetarit të kuvendit, por jo kështu. Ta zëmë, një muaj ke qenë deputet mandej pagën kalimtare e merr për një vit. Mendoj që kjo nuk është e drejtë por është e bazuar në legjislacionin në fuqi”, tha ajo.

Ajo tutje foli edhe për lëvizjet e fundit politike, ku disa ish-deputetë të Listës Guxo, në zgjedhjet e 7 qershorit do të garojnë në listën e Lidhjes Demokratike të Kosovës.

Haxhiu tha se janë qytetarët e Kosovës ata që do t’i vlerësojnë veprimet e partive politike ose të individëve brenda partive politike.

“Tani, ne kemi një ditë të zgjedhjeve, pra jemi në një proces zgjedhor. Prandaj, janë qytetarët e Kosovës ata që do t’i vlerësojnë veprimet e partive politike ose të individëve brenda partive politike. Njësoj ka ndodhur edhe në dhjetor të vitit 2025, njësoj do të ndodhë edhe më 7 qershor të vitit 2026. Meqenëse jemi në prag të këtyre zgjedhjeve, më së miri do të flasin qytetarët dhe më së miri ata i gjykojnë veprimet tona politike”, tha ajo.