Ushtruesja e detyrës së Presidentes së Kosovës, Albulena Haxhiu, ka shprehur ngushëllimet për ndarjen nga jeta të Servet Pëllumbi, duke e vlerësuar lart figurën dhe kontributin e tij në jetën akademike dhe politike.

Në telegramin e ngushëllimit drejtuar familjes Pëllumbi, Haxhiu ka theksuar se profesor Pëllumbi do të kujtohet si një mendimtar i shquar, me mprehtësi të veçantë në analizën e fenomeneve filozofike, politike dhe shoqërore.

Ajo ka vlerësuar se përmes veprës së tij akademike, ai ka ndikuar në edukimin e brezave të rinj, ndërsa përmes angazhimit publik ka dhënë shembullin e shërbimit me përgjegjësi dhe dinjitet ndaj vendit.

Sipas saj, në periudhat e vështira të tranzicionit në Shqipëria, Pëllumbi vuri dijen dhe potencialin e tij në funksion të demokratizimit dhe reformimit të sistemit.

Haxhiu ka rikujtuar edhe kontributin e tij si kryetar i Kuvendit të Shqipërisë në vitet 2002–2005, duke theksuar rolin e tij në forcimin e institucioneve demokratike dhe zhvillimin e parlamentarizmit.

Ajo ka theksuar se humbja e tij është humbje për mbarë kombin, duke shtuar se veprimtaria e tij do të mbetet udhërrëfyese për brezat që vijnë.

“I përjetshëm qoftë kujtimi për Profesor Servet Pëllumbin”, thuhet në telegramin e ngushëllimit. /Lajm.net/