Kryetari i Drenasit, Ramiz Lladrovci, ka marrë pjesë në homazhe në Gllogjan dhe Deçan me rastin e përvjetorit të rënies heroike të Luan Haradinaj dhe përkujtimit të veprimtarit Smajl Haradinaj.

Ai ka vendosur buqeta me lule në Memorialin e dëshmorëve, së bashku me familjarë të dëshmorëve, bashkëluftëtarë dhe qytetarë, duke nderuar jetën dhe veprën e tyre.

Në një deklaratë në rrjetet sociale, Lladrovci ka theksuar se në përvjetorin e 29-të të rënies së Luan Haradinajt është nderuar “luani i UÇK-së”, ndërsa është kujtuar edhe Smajl Haradinaj në përvjetorin e 17-të të kalimit në amshim.

Ai ka uruar gjithashtu Nënën Rukë, duke e vlerësuar si nënë heroinë që rriti dhe edukoi heronj të përkushtuar ndaj atdheut.

“Haradinajt e Gllogjanit janë shembull i heroizmit epik për brezat e tashëm dhe të ardhshëm. Lavdi e përjetshme për Luan dhe Smajl Haradinajn! Lavdi UÇK-së!”, ka shkruar Lladrovci. /Lajmi.net/