Kryetari i Partisë Demokratike të Kosovës, (PDK), Bedri Hamza, ka bërë sot homazhe në Prekaz në nderim të heroit Ilaz Kodra.

Hamza, së bashku me bashkëpunëtorë, ka vlerësuar lart figurën e Kodrës dhe bashkëluftëtarëve të tij, duke theksuar sakrificën e tyre për lirinë e Kosovës.

“Me bashkëpunëtorë jam këtu për të shprehur respektin dhe falënderimin deri në përulje për heroin e kombit Ilaz Kodra, me bashkëluftëtarët e tij dhe dëshmorët që dhanë jetën për liri, të cilën ne sot e gëzojmë. Mirënjohës përjetë”, ka deklaruar Hamza.

Ai shtoi se ata që luftuan për liri ishin njerëz të mëdhenj, të cilët, sipas tij, nuk e kursyen as jetën për atdheun.

“Kanë qenë njerëz të mëdhenj dhe njerëzit e mëdhenj për lirinë dhe për atdheun nuk e kursejnë as jetën. Respekt dhe falënderim i përjetshëm për heroin e kombit Ilaz Kodra dhe bashkëluftëtarët e tij”, është shprehur ai. /Lajmi.net/