Deputetët e Lëvizjes Vetëvendosje janë mbledhur sërish në Kuvendin e Kosovës në seancën e shtyrë për në ora 23:00.

Por pavarësisht kësaj, aty mungojnë deputetët e opozitës e kësisoj zgjedhja e presidentit është krejtësisht e pamundur dhe vendi do të shkojë përfundimisht drejt zgjedhjeve.

Kryetarja e Kuvendit, Albulena Haxhiu sërish u bëri thirrje opozitës që të kthehen në sallë plenare.

Ajo tha se legjislatura e dhjetë është në minutat e saj të fundit, pasi “përkundër thirrjes” që deputetët e opozitës të vijnë në sallë, ata nuk janë të pranishëm.

Ajo deklaroi se ka pasur përpjekje për të zgjedhur presidentin, por opozita kanë refuzuar.

“Deputetët e opozitës nuk janë të pranishëm në seancë as në përpjekjen e fundit për të zgjedhur presidentin e vendit sipas obligimeve kushtetuese. Po presim nëse deputetët do t’i përgjigjen thirrjes sime, e i lënë anash barrikadimet”,deklaroi Haxhiu.

“Qytetarët i kanë votuar që të vinë këtu të votojnë kundër apo abstenim e jo të mbesin korridoreve të Kuvendit, sepse sic e dimë janë këtu gjatë tërë ditës dhe në asnjë moment s’e kanë parë të arsyeshme t’i përgjigjen ftesës për zgjedhjen e presidentit të vendit.”./Lajmi.net/