Mediat ndërkombëtare, përfshirë Reuters, i kanë kushtuar vëmendje rikthimit në ring të Anthony Joshua, i cili do të përballet me boksierin shqiptar Kristian Prenga më 25 korrik në Riad. Kjo ndeshje shënon rikthimin e britanikut pas një periudhe të vështirë personale dhe shihet si hapi i parë drejt një superdueli të mundshëm me Tyson Fury në fund të vitit.

Dueli me Prengën, i cilësuar si “Kthimi”, është konfirmuar nga autoritetet saudite dhe do të transmetohet globalisht në DAZN. Shqiptari 35-vjeçar, me bazë në SHBA dhe një rekord prej 20 fitoresh e një humbjeje, konsiderohet si një kundërshtar sfidues për Joshuan, i cili kërkon të rikthejë formën e tij më të mirë pas rikuperimit.

Vetë Joshua ka deklaruar se kjo ndeshje përbën një hap të rëndësishëm në rikthimin e tij në ring, duke theksuar se ka marrë kohën e nevojshme për t’u rindërtuar fizikisht dhe mentalisht.

Në të njëjtën kohë, promotori Eddie Hearn ka bërë të ditur se kjo sfidë do të shërbejë si përgatitje për një përballje të mundshme me Furyn në nëntor, një duel që tashmë është kërkuar edhe nga vetë kampioni britanik pas fitores së tij të fundit.