Ministri i Punëve të Brendshme, Xhelal Sveçla, ka njoftuar se mbrëmë është zhvilluar një aksion i gjerë policor në disa lokacione në Mitrovicë dhe Vushtrri, në kuadër të luftës kundër kriminalitetit.

Sipas tij, operacioni ka pasur në shënjestër veprimtari të dyshimta që lidhen me organizimin e skemave piramidale dhe bixhozin e paligjshëm.

Si rezultat i këtij aksioni, janë arrestuar 26 persona, ndërsa janë sekuestruar rreth 150 mijë euro.

Sveçla theksoi se aksione të tilla po zhvillohen në të gjithë territorin e Kosovës, me një qëllim të qartë – luftimin e kriminalitetit pa kompromis.

“Përveç aksionit anti-drogë në Pejë, mbrëmë u realizua edhe një operacion tjetër i madh në dhjetëra lokacione në Mitrovicë dhe Vushtrri. Të përkushtuar për rend dhe ligj. Kudo”, ka deklaruar ai. /Lajmi.net/