Një përballje e tensionuar është regjistruar në emisionin italian “Le Iene”, ku sulmuesi i Fiorentinës, Moise Kean, është takuar me influencuesin dhe analistin e futbollit Kristian Pengwin, pas një debati të nisur në rrjetet sociale.

Situata ka eskaluar menjëherë sapo palët janë përballur fizikisht, duke u kthyer nga një tentativë sqarimi në një konflikt verbal të fortë.

Kean reagoi ashpër ndaj Pengwin, duke përdorur gjuhë kërcënuese:

“Do të të rrah për vdekje. Largohu nga rruga ime, ke dy sekonda për të dalë nga shtëpia ime.”

VIDEO

Konflikti lidhet me komentet publike të Pengwin për performancën e sulmuesit italian, të cilat Kean i kishte konsideruar ofenduese dhe të padrejta. Influencuesi kishte analizuar negativisht paraqitjet e tij, duke përfshirë edhe krahasime me lojtarë të tjerë.

Gjatë takimit, Pengwin u përpoq të kërkonte sqarim dhe qetësim të situatës, duke theksuar se kishte ardhur vetëm për dialog, por përballja u tensionua edhe më tej.

Në një moment ndërhyrje, ekipi i “Le Iene” u detyrua të ndërpriste situatën pasi atmosfera u bë e nxehtë dhe e pakontrollueshme./