Gjatë ditës së sotme, disa komisione të Kuvendit të Kosovës do të zhvillojnë mbledhje me agjenda të ndryshme, duke trajtuar çështje që lidhen me energjinë, financat dhe emërimet institucionale.

Që nga ora 09:00, komisioni ad-hoc i ngarkuar me përzgjedhjen e anëtarëve të Bordit të RTK-së do të nisë procesin e intervistimit të kandidatëve të propozuar për këtë organ drejtues, transmeton lajmi.net.

Në të njëjtën orë, Komisioni për Ekonomi, Industri, Ndërmarrësi, Tregti dhe Inovacion do të mblidhet për të shqyrtuar në parim projektligjin që rregullon sektorin e energjisë elektrike.

Më vonë, në orën 11:00, Komisioni për Legjislacion do të zhvillojë intervista me kandidatët që synojnë të bëhen pjesë e Këshillit Gjyqësor të Kosovës.

Po në këtë orar, edhe Komisioni për Buxhet do të mbajë mbledhjen e radhës, ku fillimisht pritet të miratohet rendi i ditës dhe procesverbali i mbledhjes së kaluar.

Në vijim, do të shqyrtohen dokumente të rëndësishme financiare, përfshirë Kornizën Afatmesme të Shpenzimeve të Kuvendit për periudhën 2027–2029, raportin vjetor të shpenzimeve për vitin 2025, si dhe raportin financiar të Avokatit të Popullit për të njëjtin vit. Mbledhja parashikon edhe diskutime për çështje të tjera të ndryshme./lajmi.net/