Një incident i rëndë me armë zjarri është raportuar në rrugën për në Bjeshkën e Radushës në komunën e Istog, ku policia ka arrestuar një të mitur.

Sipas Policisë së Kosovës, njësitë patrulluese kanë urdhëruar ndalimin e një veture, por drejtuesi nuk është ndalur fillimisht. Pas ndjekjes, policia ka arritur ta ndalojë automjetin dhe gjatë kontrollit ka gjetur e sekuestruar një karikator të armës AK-47 me 29 fishekë, raporton lajmi.net

Automjeti dyshohet se drejtohej nga një i mitur, shtetas kosovar, i cili është arrestuar në vendngjarje.

Po ashtu, gjatë kontrollit të terrenit në afërsi të vendit të ngjarjes është gjetur edhe një armë automatike AK-47 me karikator dhe 19 fishekë, që dyshohet se është hedhur nga vetura gjatë tentimit për t’u larguar.

Me vendim të prokurorit, pas intervistimit në prani të prindit dhe avokatit mbrojtës, i dyshuari është dërguar në mbajtje prej 24 orësh./Lajmi.net/