Kryetari i Skenderajt, Sami Lushtaku, ka njoftuar për mbylljen e dy Ambulancave të Mjekësisë Familjare në vendbanimet me komunitet joserb në Banjë dhe Syriganë, të cilat sipas tij kishin funksionuar jashtë sistemit ligjor të Republikës së Kosovës.

Sipas Lushtakut, vendimi është marrë pas pranimit dhe verifikimit të informatave, të cilat treguan se këto ambulanca operonin në mënyrë ilegale dhe nën menaxhimin e strukturave paralele, transmeton lajmi.net.

“Ajo që kemi gjetur është e papranueshme: medikamente pa banderola dhe me afat të skaduar, përdorim i vulave dhe recetave mjekësore pa prezencën e mjekut dhe shumë shkelje të tjera që bien në kundërshtim me ligjet dhe protokollet shëndetësore”, ka deklaruar ai.

Ai theksoi se këto shkelje përbëjnë rrezik serioz për qytetarët.

“Kjo përveçse shkelje ligjore përbën rrezikim të drejtpërdrejtë për jetën dhe shëndetin e qytetarëve”, u shpreh Lushtaku.

Tutje, ai bëri të ditur se institucionet përgjegjëse janë njoftuar për rastin, përfshirë edhe Agjencinë e Kosovës për Produkte dhe Pajisje Medicinale, ndërsa janë ndërmarrë veprimet e nevojshme ligjore.

Sipas tij, këto ambulanca mund të rikthehen në funksion vetëm pasi të integrohen plotësisht në sistemin shëndetësor të Kosovës dhe të veprojnë në përputhje me Kushtetutën dhe ligjet në fuqi.

“Nuk do të lejojmë që askush të rrezikojë jetën dhe shëndetin e qytetarëve duke vepruar jashtë sistemit dhe ligjeve të Republikës së Kosovës”, ka përfunduar Lushtaku.