Një mjet i pashpërthyer është gjetur të martën pasdite në Rahovec, gjatë kryerjes së punimeve në një shtëpi.

Sipas raportit 24-orësh të Policisë së Kosovës, rasti është raportuar rreth orës 15:40 nga një qytetar, i cili ka hasur në një mjet të dyshuar shpërthyes gjatë punimeve.

Menjëherë pas raportimit, njësitet policore kanë dalë në vendin e ngjarjes dhe kanë siguruar perimetrin për të parandaluar çdo rrezik të mundshëm, shkruan lajmi.net.

Më pas, në vendngjarje ka intervenuar njësiti për deminim i Forcës së Sigurisë së Kosovës (FSK), i cili ka bërë shpërthimin e kontrolluar të mjetit pa shkaktuar incidente apo pasoja.

Policia ka bërë të ditur se rasti është trajtuar në mënyrë profesionale dhe pa rrezikuar jetën e qytetarëve. /Lajmi.net/