Policia e Kosovës ka arrestuar mbrëmë në Pejë Korab Bajgorën, i dyshuar për kërcënime ndaj kreut të Aleancës për Ardhmërinë e Kosovës, Ramush Haradinaj, pas publikimit të një videoje në rrjetin social Facebook.

VIDEO: Momenti i arrestimit të Korab Bajgorës

Në video, i dyshuari transmetonte drejtpërdrejt dhe përdorte gjuhë fyese dhe kërcënuese ndaj Haradinajt dhe familjes së tij, transmeton lajmi.net.

Ai ndër të tjera tha: “E kam për obligim për Fidan Shatin me ua dh* shpirtat, hajdeni kuvat e dexhallit që vran fëmi. Ta qfsha Anitën n’zemër”, duke përmendur edhe bashkëshorten e liderit të AAK-së.

Sipas raportit policor, i dyshuari mashkull kosovar u arrestua më 3 prill rreth orës 18:00 në Sheshin “Shkëlzen Haradinaj” në Pejë, nën dyshimin për veprat penale “ngacmim” dhe “armëmbajtje pa leje”.

Gjatë kontrollit në shtëpinë e tij, autoritetet gjetën dhe konfiskuan dy armë zjarri – pistoleta, njëra prej të cilave ishte e pajisur me katër fishekë.

I dyshuari është intervistuar dhe me vendim të prokurorit i është caktuar masa e ndalimit për 48 orë. Hetimet për rastin janë duke vazhduar nga organet e drejtësisë.