Analisti dhe publicisti Shenoll Muharremi ka reaguar ashpër ndaj vendimit për pagën e 13-të, duke e cilësuar atë si një masë me prapavijë elektorale dhe kosto të lartë për ekonominë e vendit.

Sipas tij, kjo skemë pritet t’i kushtojë rreth 75 milionë euro tatimpaguesve, ndërsa nuk adreson asnjë nga sfidat kryesore ekonomike në afatgjatë. Përkundrazi, Muharremi vlerëson se një injektim i tillë i parasë në treg rrit kërkesën për produkte të importuara, duke nxitur inflacionin dhe duke përkeqësuar deficitin tregtar, i cili tashmë ka kaluar mbi 6 miliardë euro.

Ai thekson se këto mjete do të mund të orientoheshin në projekte strategjike, si rritja e kapaciteteve energjetike në vend, që sipas tij do të sillnin përfitime më të qëndrueshme për qytetarët dhe bizneset.

Muharremi gjithashtu argumenton se me këtë shumë do të ishte e mundur të subvencionohej energjia elektrike, duke parandaluar rritjen e çmimeve dhe duke zbutur presionin inflacionist. Sipas tij, kjo do të mund të kursente deri në 1 miliard euro për ekonominë në një periudhë 2–3 vjeçare.

Në reagimin e tij, ai kritikon edhe mungesën e mbështetjes për sektorin e bujqësisë, veçanërisht në raport me çmimet e naftës, duke akuzuar qeverinë se ndërmerr veprime kryesisht në funksion të përfitimeve elektorale. /Lajmi.net/