Kryeministri i Kosovës, Albin Kurti, ka përkujtuar 27-vjetorin e masakrave në disa lokalitete të vendit, duke nderuar viktimat civile të vrara gjatë Lufta e Kosovës.

Në mesazhin e tij, Kurti theksoi përmasat e krimeve të kryera më 26 mars 1999, duke kujtuar viktimat në Krushë të Madhe dhe Krushë të Vogël, si dhe masakrat në Suharekë, Padalishtë, Landovicë dhe Gjakovë.

“Sot kujtojmë me dhimbje 243 civilët e vrarë në Krushë të Madhe dhe 113 në Krushë të Vogël, më 26 mars 1999,” u shpreh ai, transmeton lajmi.net.

Kryeministri rikujtoi gjithashtu zhdukjen me dhunë të 64 banorëve dhe shkatërrimin e mbi 700 shtëpive, bashkë me objekte fetare e kulturore. Ai përmendi edhe vrasjen e 48 anëtarëve të familjes Berisha në Suharekë, trupat e të cilëve u gjetën në varrezë masive në Batajnicë, si dhe viktimat në Padalishtë, Landovicë dhe Gjakovë.

Duke i cilësuar këto krime si dëshmi të rënda të asaj që ai e quan gjenocid i Serbisë në Kosovë, Kurti theksoi domosdoshmërinë e drejtësisë: “Përballë këtyre krimeve, ka vetëm një përgjigje dinjitoze: të vihet në vend drejtësia si imperativ moral, juridik dhe historik.”

Ai nënvizoi përgjegjësinë e institucioneve ndaj së kaluarës dhe së ardhmes, duke shtuar se angazhimi për drejtësi dhe paqe të qëndrueshme mbetet thelbësor.

Në përfundim, Kurti shprehu nderim për viktimat, duke deklaruar: “Me zemrat e mbushura plot dashuri, respekt dhe krenari, përkulemi sot e gjithmonë para kujtimit të të gjithë të vrarëve tanë.”

Postimi i plotë:

Në këtë 27-vjetor, nderojmë kujtimin e të vrarëve në masakrat në Krushë të Madhe, Krushë të Vogël, Suharekë, Padalishtë, Landovicë dhe Gjakovë.

Sot kujtojmë me dhimbje 243 civilët e vrarë në Krushë të Madhe dhe 113 në Krushë të Vogël, më 26 mars 1999. Forcat e armatosura të Serbisë zhdukën me dhunë 64 krushjanë, ndërsa dogjën mbi 700 shtëpi, bashkë me institucione fetare e kulturore.

Nuk i harrojmë 48 anëtarët e familjes Berisha në Suharekë (trupat e të cilëve u dërguan në varrezë masive në Batajnicë, afër Beogradit), 19 anëtarët e familjes Imeraj në Padalishtë, si dhe 23 të vrarët në Landovicë e gjashtë të vrarët në Gjakovë.

Këto vrasje e zhdukje me dhunë janë dëshmi të fuqishme të gjenocidit të Serbisë në Kosovë. Përballë këtyre krimeve, ka vetëm një përgjigje dinjitoze: të vihet në vend drejtësia si imperativ moral, juridik dhe historik.

Si Republikë, kemi përgjegjësi të dyfishtë: ndaj së kaluarës dhe ndaj së ardhmes. Ndaj së kaluarës, duke dokumentuar e kërkuar llogari për krimet e luftës, krimet kundër njerëzimit dhe gjenocidin e Serbisë në Kosovë. Ndaj së ardhmes, duke u angazhuar për paqe të qëndrueshme, për jetë më të mirë të brezave të rinj, e për ata të cilët do të vijnë pas nesh.

Si institucione e si qytetarë të Republikës, po angazhohemi bashkë për Republikën tonë, ashtu siç ishin idealet e dëshmorëve e martirëve, ashtu siç janë dëshirat e rinisë e ëndrrat e fëmijëve tanë.

Me zemrat e mbushura plot dashuri, respekt dhe krenari, përkulemi sot e gjithmonë para kujtimit të të gjithë të vrarëve tanë. Rënien e tyre me flijim e me sakrificë, e kemi udhërrëfim.

I përjetshëm qoftë kujtimi për ta!/lajmi.net/