Fajde me kamatë mujore 100% në Prizren, dy të dyshuar përfundojnë në pranga – njëri 32 vjeç, tjetri 22

Lajme

20/02/2026 10:02

Sektori Rajonal i Hetimeve në Prizren ka arrestuar më 19 shkurt dy persona nën dyshimin për kryerje të veprës penale “Fajde”. Gjatë operacionit policor janë sekuestruar para të gatshme dhe prova të tjera materiale.

Sipas policisë, të dyshuarit, F.B., 32 vjeç, dhe L.G., 22 vjeç, dyshohet se kanë përfituar në mënyrë të kundërligjshme duke kontraktuar borxhe me kushte të padrejta, duke i ngarkuar viktimën me kamatë mujore prej 100%, përfitim ky i bazuar në gjendjen e rëndë financiare të viktimës, transmeton lajmi.net.

Gjatë operacionit janë kontrolluar banesa dhe objekte të tjera të dyshuarve, dhe materialet e sekuestruara janë duke u përdorur si prova në hetime. Pas intervistimit në prezencë të avokatit mbrojtës, me vendim të prokurorit të Prokurorisë Themelore në Prizren, të dyshuarit janë ndaluar për 48 orë dhe dërguar në qendrën e mbajtjes në stacionin policor.

Hetuesit, në bashkëpunim me prokurorinë, po vazhdojnë mbledhjen e provave dhe dëshmive për sqarimin e plotë të rastit.

Njoftimi i plotë:

Goditet edhe një rast i fajdeve në Prizren- Arrestohen dy të dyshuar

Prizren, 19 shkurt 2026

Sektori Rajonal i Hetimeve në Prizren, më datë 19.02.2026, ka arrestuar dy të dyshuar për fajde. Në vendngjarje janë sekuestruar para dhe prova materiale.

Konkretisht, Sektori Rajonal i Hetimeve/DRP-Prizren, pas ndërmarrjes së veprimeve hetimore në bashkëpunim me Prokurorinë Themelore në Prizren, ka realizuar një operacion policor për arrestimin e dy personave të dyshuar, për shkak të dyshimit të bazuar se kanë kryer veprën penale “Fajde” nga neni 331 i KPRK-së. Të dyshuarit, në bashkëpunim, me qëllim të përfitimit të kundërligjshëm të pasurisë, kanë kontraktuar një shumë dukshëm jo proporcionale në këmbim të dhënies së borxhit, duke shfrytëzuar gjendjen e rëndë financiare të viktimës dhe duke e ngarkuar me kamatë mujore shumë të lartë, prej 100%.

Gjatë operacionit policor është kontrolluar shtëpia dhe objektet tjera përcjellëse të dyshuarve në Prizren. Lidhur me këtë janë sekuestruar para të gatshme dhe prova të tjera materiale.

Pas arrestimit, të dyshuarit F.B., mashkull 32-vjeçar, dhe L.G., mashkull 22-vjeçar, nga Prizreni, janë intervistuar në prezencë të avokatit mbrojtës të caktuar sipas detyrës zyrtare. Me aktvendim të prokurorit nga Prokuroria Themelore në Prizren, ndaj tyre është caktuar masa e ndalimit për 48 orë. Të dyshuarit janë dërguar në qendrën e mbajtjes në stacionin policor në Prizren.

Hetuesit, në bashkërendim me prokurorin e shtetit, po punojnë intensivisht në mbledhjen e provave dhe dëshmive lidhur me këtë rast./lajmi.net/