Policia e Kosovës ka bërë të ditur se një shtetas kosovar, i kërkuar me urdhër arrest ndërkombëtar, është ekstraduar nga Britania e Madhe në Kosovë.

Sipas njoftimit, ekstradimi është realizuar më 5 shkurt 2026 nga Drejtoria për Bashkëpunim Ndërkombëtar Policor, në koordinim me njësitë relevante të Policisë së Kosovës dhe institucionet e drejtësisë. I dyshuari, me inicialet R.K., ishte arrestuar nga autoritetet britanike, pasi kërkohej nga institucionet e drejtësisë së Republikës së Kosovës për veprën penale “grabitje”, ndërsa dyshohet se i ishte shmangur drejtësisë, transmeton lajmi.net.

Policia ka theksuar se ky ekstradim është realizuar falë bashkëpunimit të ngushtë ndërinstitucional ndërmjet autoriteteve të Republikës së Kosovës dhe atyre të Britanisë së Madhe.

Pas ekstradimit, i dyshuari i është dorëzuar njësive përkatëse të Policisë në rajonin e Prishtinës, për vazhdimin e procedurave të mëtejme ligjore.