Prokuroria Themelore në Prizren, përmes Departamentit për Krime të Rënda, ka ngritur aktakuzë ndaj dy personave nën dyshimin për përfshirje në marrje dhe dhënie të ryshfetit.

Sipas aktakuzës, i pandehuri A.K. akuzohet për veprën penale “Marrja e ryshfetit”, ndërsa i pandehuri B.C. për veprat penale “Dhënia e ryshfetit” dhe “Kalimi i paautorizuar i vendkalimeve kufitare ose i vijës kufitare”, të Kodit Penal të Republikës së Kosovës, raporton lajmi.net

Prokuroria bën të ditur se rasti ka ndodhur më 22 dhjetor 2025, rreth orës 08:10, në Pikën Kufitare të Vërmicës. Sipas hetimeve, A.K., në cilësinë e zyrtarit policor, dyshohet se ka kërkuar dhe pranuar ryshfet nga B.C., me qëllim përfitimi pasuror personal. Duke shfrytëzuar pozitën zyrtare dhe duke qenë i veshur me uniformë policore, ai i ka mundësuar B.C.-së hyrjen në Kosovë, ndonëse këtij të fundit i ishte refuzuar hyrja për mungesë dokumentacioni.

Pas pranimit të parave, A.K. dyshohet se e ka kaluar në mënyrë të kundërligjshme kufirin me veturën e tij, së bashku me B.C.-në, duke e dërguar atë në Prizren.

Prokurori i çështjes i ka propozuar gjykatës që, pas shqyrtimit gjyqësor dhe administrimit të provave, të pandehurit të shpallen fajtorë dhe të dënohen sipas ligjit.

Gjithashtu, është kërkuar që ndaj A.K.-së, përveç dënimit kryesor, të shqiptohet edhe masa plotësuese e ndalimit të ushtrimit të funksioneve në administratën publike apo shërbimin publik./Lajmi.net/