Pas suksesit të vitit të kaluar, Studio e Arkitekturës FERIZI ARCHITECTS ka përmbyllur me sukses edicionin e dytë të projektit “House of Kosova” në kuadër të Forumit Ekonomik Botëror 2026.

Projekti, i ideuar nga arkitekti Ernest Ferizi, përfaqëson një hapësirë prej 500 m² e cila shkon përtej dimensionit fizik. “Shtëpia e Kosovës” është konceptuar si një manifestim i identitetit kombëtar, duke ndërthurur trashëgiminë kulturore me arkitekturën moderne.

Në Davos, ku mblidhen liderë botërorë, investitorë dhe vizionarë, ky projekt ka shërbyer si një urë lidhëse mes bizneseve të diasporës, mbështetjes së LIKA Group, dhe potencialit të Kosovës për t’u prezantuar si një vend me energji kreative dhe ambicie globale.

Simbol i kulturës dhe inovacionit:

“Shtëpia e Kosovës” nuk është thjesht një ekspozitë arkitekturore, por një hapësirë ku arti, kultura dhe biznesi bashkohen. Me dizajnin e saj modern, të frymëzuar nga elemente të trashëgimisë shqiptare, projekti ka tërhequr vëmendjen e vizitorëve ndërkombëtarë, duke e vendosur Kosovën në një kontekst të ri të dialogut global.

Ky prezantim në Davos është një dëshmi e qartë se Kosova, përmes kreativitetit dhe vizionit të arkitektëve të saj, mund të krijojë hapësira që flasin gjuhën e artit dhe inovacionit, duke e bërë vendin tonë pjesë të hartës kulturore dhe ekonomike botërore.