Disa linja ajrore vazhduan edhe sot të shmangin hapësirën ajrore të Iranit, sipas faqeve të ndjekjes së fluturimeve.

Teherani e mbylli hapësirën ajrore për më shumë se katër orë, përpara se ta rihapte atë gjatë natës pa dhënë ndonjë shpjegim, ndërsa tensionet në rajon mbeten të larta.

Edhe pas rihapjes, Wizz Air, Lufthansa, British Airways, Singapore Airlines dhe TUI vazhduan të përdorin itinerare alternative.

Sipas Reuters, këto kompani ajrore zgjodhën rrugë që kalojnë mbi Afganistan dhe Azinë Qendrore.

Gjatë dy viteve të fundit, shumë linja ajrore perëndimore kanë ndryshuar itineraret e fluturimeve në Lindjen e Mesme, duke fluturuar më shpesh mbi Afganistan, pavarësisht sundimit të vazhdueshëm të talibanëve, në përpjekje për të shmangur zona të tjera konflikti më të rrezikshme.

Të mërkurën, Gjermania lëshoi një udhëzim të ri që paralajmëron linjat ajrore të vendit të mos hyjnë në hapësirën ajrore të Iranit, pak pasi Lufthansa riorganizoi operacionet e saj të fluturimeve në të gjithë Lindjen e Mesme.