KESCO ka bërë thirrje për kursim të energjisë elektrike, duke njoftuar se aktualisht po përballet me rritje të ndjeshme të sasisë së energjisë së importuar, si pasojë e kërkesës së lartë dhe çmimeve të rritura në tregun ndërkombëtar.

Sipas kompanisë, gjatë dy ditëve të fundit, rreth 50 për qind e konsumit të energjisë elektrike në Kosovë është mbuluar përmes importit, gjë që po krijon presion shtesë në menaxhimin e kostove dhe sigurimin e furnizimit të qëndrueshëm.

KESCO thekson se varësia nga importi shoqërohet me kosto të larta, veçanërisht në një periudhë kur kërkesa për energji është e rritur edhe në vendet e rajonit.

Në këtë kontekst, kompania u ka bërë thirrje qytetarëve që të kursejnë energjinë elektrike, sidomos gjatë orëve të pikut, me qëllim uljen e nevojës për import dhe mbajtjen nën kontroll të kostove të furnizimit.

KESCO ka bërë të ditur se do ta përcjellë nga afër situatën dhe do të ndërmarrë të gjitha veprimet e nevojshme për të garantuar furnizim të qëndrueshëm dhe të besueshëm për konsumatorët, duke falënderuar qytetarët për mirëkuptimin dhe bashkëpunimin.

Komunikata e plotë: 

KESCO me kërkesë për kursim të energjisë elektrike, sasia e importuar shumë e lartë