Anthony Joshua ka qenë i përfshirë në një aksident të rëndë automobilistik në Nigeri, ku dy persona që udhëtonin me të humbën jetën. Ngjarja ka ndodhur në rrugën Lagos–Ibadan, një nga akset më të frekuentuara në vend, teksa automjeti ku ndodhej boksieri britanik u përplas me një kamion të ndalur.

Sipas autoriteteve lokale, Joshua ndodhej në sediljen e pasme të makinës dhe ka pësuar vetëm lëndime të lehta, duke u dërguar në spital për kontrolle mjekësore. Dy viktimat, bashkëpunëtorë të afërt të tij, nuk arritën t’u mbijetojnë plagëve të marra dhe u shpallën të vdekur në vendngjarje.

Policia nigeriane ka nisur hetimet për të sqaruar rrethanat e aksidentit, ndërsa dyshohet se shpejtësia dhe kushtet e rrugës mund të kenë ndikuar në përplasjen fatale. Ngjarja ka shkaktuar reagime të shumta në botën e sportit, me mesazhe ngushëllimi për familjet e viktimave dhe urime për shërimin e shpejtë të Anthony Joshua.