Presidenti rus Vladimir Putin ka paralajmëruar të mërkurën se Moska mund të zgjeronte përparimet e saj në Ukrainë në rast se Kievi dhe aleatët perëndimorë refuzojnë të plotësojnë kërkesat e Kremlinit gjatë bisedimeve të paqes.

Sipas Associated Press, presidenti amerikan Donald Trump ka nisur një përpjekje diplomatike për të përfunduar gati katër vitet e luftës pas pushtimit të plotë rus të Ukrainës në shkurt 2022. Megjithatë, përpjekjet e Uashingtonit kanë hasur në kërkesa të kundërta dhe të ashpra nga Moska dhe Kievi, transmeton lajmi.net.

Në një takim vjetor me oficerë të lartë ushtarakë, Putin theksoi se Rusia preferon të arrijë qëllimet e saj dhe të “eliminojë shkaqet rrënjësore të konfliktit” përmes mjeteve diplomatike. Ai shtoi se, nëse pala tjetër dhe aleatët e saj të huaj refuzojnë të angazhohen në dialog të sinqertë, Rusia do të përdorë “mjete ushtarake për të çliruar tokat e saj historike”.

Ukraina dhe aleatët e saj perëndimorë i konsiderojnë veprimet e Rusisë si shkelje të sovranitetit dhe si një akt agresioni të paprovokuar./lajmi.net/