Oda Ekonomike e Kosovës ka shprehur sot shqetësimin për deklaratat e ministres në detyrë, Artane Rizvanolli, e cila para mediave e ka cilësuar OEK-un si “aktor politik opozitar” dhe ka pretenduar se OEK ka dekurajuar bizneset të aplikojnë për skema grantesh.

Sipas OEK, këto pretendime janë të pabazuara dhe të papranueshme, duke theksuar se institucioni ka bashkëpunuar me çdo qeveri për dekada me radhë dhe ka inkurajuar vazhdimisht bizneset të përfitojnë nga të gjitha skemat mbështetëse, përfshirë edhe grantet, transmeton lajmi.net.

OEK nënvizon se çdo deklarim i kundërt synon të njollosë reputacionin e institucionit dhe kontributin e tij në shërbim të komunitetit të biznesit.

OEK i ka kërkuar ministres Rizvanolli që deri më 8 dhjetor 2025 të dorëzojë prova të verifikueshme për pretendimet e saj. Në mungesë të këtyre provave, OEK paralajmëron se do të iniciojë procedurat ligjore për shpifje dhe dëmtim të reputacionit.

Po ashtu, Oda Ekonomike rikujton se ministrja në detyrë duhet të mbajë përgjegjësi për dëmet e shkaktuara biznesve nga mënyra e njëanshme dhe e papërgatitur e futjes së tyre në tregun e lirë të energjisë, që ka krijuar vështirësi serioze financiare dhe operacionale për shumë ndërmarrje vendore.

OEK thekson përkushtimin e saj për të vazhduar punën me profesionalizëm, pavarësi dhe transparencë, duke mbrojtur interesat e bizneseve dhe të ekonomisë së vendit.

Komunikata e plotë: 

Reagim i Odës Ekonomike të Kosovës

Çdo deklarim i kundërt nuk qëndron dhe përpiqet të njollosë punën dhe kontributin tonë shumëvjeçar në shërbim të komunitetit të biznesit.