CEFTA duhet të shërbejë si platforma që ndihmon të gjitha palët të përputhen me standardet e BE-së, tha Rozeta Hajdari ministre në detyrë e Industrisë, Ndërmarrësisë dhe Tregtisë.

Hajdari në ngjarjen “Java e CEFTA-s 2025 – Tregtim i Përbashkët, Drejt Evropës”, theksoi se gjatë kryesimit të CEFTA-s nga Kosova është synuar zbatimi i masave të reja të miratuara nga CEFTA, të cilat, siç u shpreh ajo, “na afrojnë më shumë drejt integrimit ekonomik brenda tregut të përbashkët të Bashkimit Evropian”.

“CEFTA duhet të shërbejë si platforma që ndihmon të gjitha palët të përputhen me standardet e BE-së duke përmirësuar kuadrin e tyre rregullator në përputhje me udhëzimet kryesore të BE-së, dhe të ndërtojnë kapacitetet e nevojshme për të përfituar maksimalisht nga kjo mundësi transformuese. Ne kemi pasur një kryesim aktiv në CEFTA gjatë këtij viti, i synuar për të arritur zbatimin e suksesshëm të vendimeve, prioriteteve dhe masave të reja të miratuara nga CEFTA për zhvillimin e mëtejshëm të marrëveshjes, si dhe zbatimin e masave të CEFTA-s brenda planit të veprimit për tregun rajonal të përbashkët. Zbatimi i suksesshëm i masave nën planin e tregut rajonal të përbashkët, që është shtylla e dytë e planit të rritjes së BE-së, ka për qëllim të nxisë integrimin ekonomik brenda Ballkanit Perëndimor, dhe kjo na afron edhe më shumë drejt integrimit ekonomik brenda tregut të përbashkët të BE-së”, tha Hajdari.

Hajdari potencoi se kryesimi i Kosovës në CEFTA ka vënë theks të veçantë në heqjen e barrierave që ende pengojnë bizneset si dhe avancimin e tranzicionit digjital dhe atij të gjelbër.

Ajo e quan moment të ri planin e rritjes së BE-së dhe perspektivën e qasjes graduale në pjesën e tregut unik evropian.

“Kryesimi i Kosovës ka vënë theks të veçantë në heqjen e barrierave që ende pengojnë bizneset tona, në avancimin e tranzicionit digjital dhe atij të gjelbër, si dhe forcimin e themeleve për një zinxhir më të thellë të vlerës në rajon me synimin për më shumë integrim në zinxhirin e vlerës evropian dhe atë global. Një rajon i integruar më mirë në Ballkanin Perëndimor nuk është i rëndësishëm vetëm për tregtinë, është thelbësor për tërheqjen e investimeve, krijimin e vendeve të punës dhe përgatitjen e ekonomive tona për sfidat dhe mundësitë e së nesërmes. Këtë vit, qëndrojmë gjithashtu përpara një hapjeje historike: plani i rritjes së BE-së dhe perspektiva e qasjes graduale në pjesë të tregut unik evropian. Kjo krijon një moment të ri përpara nesh”, tha ajo.

Drejtoresha për Zgjerimin dhe Fqinjësinë Lindore, Valentina Superti, deklaroi se mbesin të përkushtuar për të mbështetur CEFTA-n, por rikujtoi se përparimi kërkon përgjegjësi dhe bashkëpunim të përbashkët.

“Ndërsa viti i kaluar ka qenë sfidues, është e qartë se baza teknike është vendosur në shumë fusha. Dhe në fakt, një numër i mirë i rezultateve dhe marrëveshjeve janë miratuar. Kjo u përmend edhe më parë. Dhe për këtë, unë vlerësoj angazhimin tuaj. Megjithatë, në të njëjtën kohë, tani duhet të gjejmë mënyra për të vazhduar punën drejt arritjes së proceseve të duhura pa ndërprerje të shkaktuara nga rrethanat e jashtme. Sepse besimi i mirë në zbatimin e shtyllës së dytë të planit të rritjes është mënyra e vetme që në fund mund të garantojë qasjen në tregun e përbashkët të BE-së…08:25Duke parë përpara, ne jemi me të vërtetë të bindur se kryesimi i ardhshëm shqiptar mund të ofrojë ndihmë të madhe në ndihmën për palët që të drejtojnë CEFTA-n drejt rritjes së konkurrencës së rajonit”, deklaroi ajo.

Drejtoresha e Sekretariatit CEFTA-së, Pranvera Kastrati deklaroi se në CEFTA, tregtia është zgjeruar ndjeshëm me rritje që variojnë nga 44% deri mbi 70% ndërmjet palëve.

“Shifrat dhe numrat flasin më mirë se ne dhe më fuqishëm se ne, dhe shifrat e tregtisë flasin shumë. Në CEFTA, tregtia është zgjeruar ndjeshëm me rritje që variojnë nga 44% deri mbi 70% ndërmjet palëve. Rreth 70% e tregtisë sonë është ende me Bashkimin Evropian, gjë që konfirmon rëndësinë dhe lidhjet ekonomike që kemi me BE-në dhe pse jemi kaq të përkushtuar të punojmë drejt këtij qëllimi dhe ambicie, integrimin në BE. Interesi i ekspertëve që nga viti 2024 është rritur përafërsisht 121% gjatë një dekade, gjë që është shumë”, potencoi Kastrati.

Në kuadër të Javës së CEFTA-s janë organizuar edhe panele diskutimi ku u fol për rolin e CEFTA-s dhe marrëveshjeve rajonale tregtare në një epokë të pasigurisë së shtuar dhe të modeleve dhe aleancave tregtare që po ndryshojnë./kp