Komisioni Qendror Zgjedhor ka certifikuar sot rezultatet finale të dala nga zgjedhjet lokale.

Përpos kësaj, në KQZ pati edhe diskutime në lidhje me raportimet për fletëvotimet në zgjedhje e çështje të tjera.

Pas kësaj në kuadër të rendit të ditës u bë e ditur se fushata zgjedhore e zgjedhjeve të jashtëzakonshme që do të mbahen më 28 dhjetor, nis më 17 dhjetor.

Anëtari i KQZ-së, Arianit Elshani, ka bërë të ditur se fushata zgjedhore për subjektet politike do të jetë vetëm 12 ditë, nga 17 dhjetori, deri më 28 dhjetor

“Periudha për certifikimin e partive politike do të jetë nga data 24 nëntor deri më 30 nëntor. Ky proces është ndryshe nga proceset e tjera, është i ndarë në dy faza. Bëhet fjalë për certifikimin e subjekteve politike dhe certifikimin e listave të kandidatëve të partive politike”,deklaroi Elshani.

“Lista e kandidatëve të partive politike, realizohet nga 24 nëntor deri më 7 dhjetor. Pra 7 dhjetori është data e fundit ku partitë politike mund të dorëzojnë listën e kandidatëve në KQZ”, tha Elshani.

Tërheqja e shortit nga ana tjetër, do të bëhet më 8 dhjetor.

Derisa sipas Elshanit, periudha e aplikimit për votuesit jashtë Kosovës fillon më 26 nëntor, dhe mbaron me datën 6 dhjetor. Ndryshe, periudha e votimit me postë nis më 12 dhjetor dhe përfundon më 27 dhjetor./Lajmi.net/