Kryeziu: Pa u ndryshuar sistemi zgjedhor në “një kandidat – një votë”, nuk do të kemi kurrë përfaqësim politik me kualitet

Lajme

20/11/2025 23:24

Drejtori ekzekutiv i IKD-së, Ismet Kryeziu, ka reaguar pas caktimit të datës për zgjedhje të parakohshme, duke thënë se një proces i ri zgjedhor do të ofrojë vetëm një zgjidhje të përkohshme, pa adresuar problemet thelbësore të sistemit politik në vend.

Kryeziu kritikoi ashpër sistemin aktual të votës preferenciale me deri në 10 kandidatë, duke theksuar se ai “e shtrembëron garën” dhe e zbeh peshën reale të deputetit, transmeton lajmi.net.

Sipas tij, shpërndarja e një vote në dhjetë emra nuk mat besimin e qytetarëve, por aftësinë për mobilizime të brendshme, menaxhim grupesh dhe krijim të të ashtuquajturave “dhjetshe”.

Ai paralajmëroi se ky model ul llogaridhënien, sjell kandidatë pa peshë dhe komprometon cilësinë e përfaqësimit politik.

Kryeziu kërkoi që Kosova të kalojë në sistemin “një kandidat – një votë”, duke thënë se vetëm kështu mund të sigurohet përfaqësim i mirëfilltë dhe deputetë të zgjedhur për vizion, integritet dhe punë konkrete – e jo përmes pazareve të brendshme partiake.

Postimi i plotë:

Këto zgjedhje të parakohshme do të jenë përsëri vetëm një zgjidhje afatshkurtër – jo një zgjidhje përmbajtësore për politikën dhe demokracinë tonë.

Sistemi aktual i votës preferenciale – me deri në 10 kandidatë – e dëmton rëndë garën dhe i zbeh vlerën vetë pozitës së deputetit.

Kur një votë ndahet në dhjetë emra, nuk matet më besimi real i qytetarit për një kandidat, por aftësia për të krijuar “dhjetshe”, për mobilizim mekanik dhe për menaxhim të grupacioneve e rrjeteve të brendshme partiake. Kjo e zhbën garën individuale, e ul llogaridhënien, krijon mundësi për kandidatë pa peshë reale dhe dobëson cilësinë e tërë përfaqësimit politik.

Pa u ndryshuar sistemi zgjedhor nga vota dhjetëshe preferenciale në “një kandidat – një votë”, nuk do të kemi kurrë përfaqësim politik me kualitet. Me këtë model, deputeti nuk zgjidhet për vizion, integritet apo përfaqësim të qytetarëve, por për shkak të grupeve dhe pazareve të brendshme partiake./lajmi.net/