Real Madridi përballet me një krizë serioze në repartin e mbrojtjes vetëm pesë ditë përpara El Clasicos ndaj Barcelonës.

David Alaba është lojtari më i fundit që i shtohet listës së të dëmtuarve, pasi pësoi një tërheqje muskulore në kofshën e djathtë gjatë ndeshjes ndaj Getafes.

Mbrojtësi austriak u largua nga fusha pas pjesës së parë dhe pritet të mungojë për 7 deri në 10 ditë, duke e lënë jashtë sfidave të rëndësishme që vijnë.

Alaba do të mungojë në përballjen e mesjavës në Ligën e Kampionëve ndaj Juventusit, si dhe në përballjen vendimtare ndaj Barcelonës në fundjavë.

Nëse rikuperimi i tij ecën sipas planit, ai mund të rikthehet për sfidën kundër Valencias në Santiago Bernabeu, përpara ndeshjes së radhës kundër Liverpoolit.

Në këtë moment, trajneri Xabi Alonso ka në dispozicion vetëm pesë mbrojtës të gatshëm: Eder Militao, Raul Asencio, Ferland Mendy, Alvaro Carreras dhe Fran Garcia, tre prej të cilëve janë natyralisht të pozicionuar në të majtë të mbrojtjes.

Për të mbushur boshllëqet, janë bërë disa zgjidhje të improvizuara si aktivizimi i Fede Valverdes në krahun e djathtë, ndërsa edhe mesfushorët Camavinga dhe Tchouameni janë përdorur në mbrojtje kur është dashur.

Carreras gjithashtu ka luajtur si pjesë e një mbrojtjeje me tre këtë sezon.

Shpresat e klubit janë që Dean Huijsen, Dani Carvajal dhe Trent Alexander-Arnold të jenë të gatshëm për El Clasico, megjithëse vetëm Huijsen shihet si opsion real për të nisur nga minuta e parë.

Në rast se ai nuk arrin të rikuperohet në kohë, pritet që mbrojtja ndaj Barcelonës të përbëhet nga Alvaro Carreras, Eder Militao, Raul Asencio dhe Federico Valverde.

Në një periudhë kyçe të sezonit, Real Madridi përballet me mungesa të mëdha në prapavijë, teksa kalendari ofron sfida të mëdha në kampionat dhe Evropë.