Dje, në të gjitha komunat e Kosovës, përfshirë edhe ato me shumicë serbe janë mbajtur zgjedhjet lokale. Gjatë 12 orëve, qytetarët e Kosovës kanë pasur mundësi të votojnë kandidatin e tyre të preferuar për kryetar si dhe atë për Kuvend Komunal.

Të njëjtin proces e kanë kryer edhe qytetarët serb të komunave me shumicë serbe në Kosovë, përfshirë ato në veri dhe komunat e tjera.

Ndonëse pothuajse në secilën komunë me shumicë serbe kishte kandidat edhe shqiptarë, asnjërën prej tyre nuk e fituan ata.

Nëntë nga dhjetë komunat me shumicë serbe, i ka fituar Lista Serbe pa balotazh me përqindje shumë të lartë të të votave. Vetëm në Komunën e Kllokotit do të ketë balotazh mes dy kandidatëve serb.

Kandidati i Listës Serbe për kryetar të Leposaviqit, Zoran Todiç ka fituar këtë garë me 70,35% të votave, apo 2 mijë e 384 vota.

Todiç ka lënë pas vetës Vladimir Radosavljeviç me 11,45%, Vesna Pantoviç me 6,76%, Ivan Vuçkoviç me 6,11%, Nenad Radosavljeviç me 2,63% si dhe të gjashtin me radhë, Shaqir Hetemin e PDK-së me vetëm 1,71% të votave apo 58 sosh.

Sikurse në Leposaviq, edhe në Novobërdë ka fituar kandidati i Listës Serbe, Sasa Miloseviç me 62,3% të votave apo 3 mijë e 569 sosh. Ai ka lënë pas vetes Bajrush Ymerin e LDK-së me 21,84$, Abdyl Gashin e VV-së me 9,9%, Ajet Avdilin e AAK-së me 3,58% dhe Selatin Nuhiun e PDK-së me 2,39%.

E njëjta ka ndodhur edhe në Komunën e Shtërpcës, ku ka fituar pa balotazh kandidati i Listës Serbe, Ivica Tanasijeviç me 59,44%. Ai ka lënë pas Garip Sahitin e PDK-së me 9,58%, Stefan Stamenkoviç nga Pravda i Jednakost me 8,68%, Valmir Ahmetin e LDK-së me 8,67%, Slabadan Nikolceviç me 8,25% dhe Shpejtim Arifin e VV-së me 5,37%.

Lista Serbe ka fituar edhe në Zubin Potok, me kandidatin Milos Peroviç i cili ka mbledhur 70,99%. Pas tij është Milija Bisevaç nga Srpski Narodni Pokret me 6,99%, Vedat Mehmeti i VV-së me 5,66%, Izmir Zeqiri i PDK-së me 4,69%, Stefan Vuloviç nga Kosovski Savez me 4,47% dhe Gordana Mihajloviç me 3,14 %.

Lista Serbe ka triumfuar edhe në Zveçan, me kandidatin Dragisa Miloviç që ka marrë 86,66% të votave. Kandidati i dytë në këtë Komunë ka dal Zoran Obrenoviç me 8,47% të votave, Fetah Peci i VV-së me 2,09%, Ilir Peci i PDK-së me 1,85% dhe Sladjana Pantoviç nga Ujedinjenje me 0,94%.

Pa balotazh, Lista Serbe e mori edhe Komunën e Graçanicës, pavarësisht që të gjitha partitë shqiptare kandiduan me një kandidat të përbashkët, Leutrim Ajetin nga Aleanca Shqiptare.

Novak Ziviç nga Lista Serbe ka fituar 62,54%, Leutrim Ajeti nga Aleanca Shqiptare me 23,15%, Igor Rasiç nga Za Slobodu Pravdu i Opstanak me 12,9%, Goran Marinkoviç nga Kosovski Savez me 1,41%.

Në katër vitet e ardhshme, edhe Ranilluga do të udhëhiqet nga kandidati i Listës Serbe, Tanja Antiç i cili ka fituar me 71,05%. Kandidati i dytë në bazë të rezultatit në këto zgjedhje është Ivan Petroviç nga Srpski Narodni Pokret me 14,08%, pastaj Igor Mitiç nga Za Slobodu Pravdu i Opstanak më 12,71% dhe Bojan Arsiç nga Kosovski Savez me 2,16%.

Edhe Parteshi u fitua bindshëm nga kandidati i Listës Serbe, Dragan Petkoviç i cili mori 89,88% të votave ndërsa i dyti doli Sladjan Mladenoviç me 10,12%.

Milan Radojeviç do të jetë kryetari i Mitrovicës së Veriut në katër vitet e ardhshme, pasi i fitoi zgjedhjet me 60,25% të votave. Pas tij është Marko Jaksiç nga Gradanska inicijativa Sever za svve me 12,28%, Erden Atiç me 10,8% të vota, Aleksandar Arsenijoviç nga Srpska Demokratija me 7,29%, Flutura Hamza Azemi nga PDK mos 4,09% dhe Nenad Vukmoriviç nga Za Slobodu Pravdu i Opstanak me 1,65%.

Komuna e vetme në të cilën Lista Serbe ka shkuar në balotazh, është ajo e Kllokotit.

Bozidar Dejanoviç ka mbledhur 41,62% të votave duke dal i pari për të shkuar në balotazh me Srecko Spasiç nga Srpska Narodna Sloga i cili ka mbledhur 31,43% të votave. Arbër Emini ka mbledhur 23,50 të votave ndërsa Goran Marinkoviç nga Kosovski Savez ka marrë 3,45%.

Kryetari i Listës Serbe, Zllatan Ellek, dje ka deklaruar në Mitrovicën e Veriut se Lista Serbe ka shënuar “fitore bindëse”.

“Kjo nuk është vetëm fitorja e Listës Serbe, kjo është fitorja e popullit serb, e unitetit dhe e bashkimit serb dhe e gjithçkaje që është serbe në Kosovë”, tha Ellek.

Ai falënderoi presidentin e Serbisë, Aleksandar Vuçiq, dhe Qeverinë e Serbisë për mbështetjen.