Maliqi jep dy shpjegime pse VV s’po bën kompromis: Ish-opozita po tregohet më se korrekte
Njohësi i çështjeve politike, Agon Maliqi, ka komentuar situatën politike në vend, ku sot, në seancën vazhduese të konstituimit të Kuvendit, edhe pas aktgjykimit të Kushtetuese, parlamenti s’u konstitua. Maliqi në reagimin e tij vlerësoi se partitë që kanë qenë në opozitë, janë duke u treguar ‘’më se korrekte’’ dhe të gatshme për të votuar…
Lajme
Njohësi i çështjeve politike, Agon Maliqi, ka komentuar situatën politike në vend, ku sot, në seancën vazhduese të konstituimit të Kuvendit, edhe pas aktgjykimit të Kushtetuese, parlamenti s’u konstitua.
Maliqi në reagimin e tij vlerësoi se partitë që kanë qenë në opozitë, janë duke u treguar ‘’më se korrekte’’ dhe të gatshme për të votuar një kandidat më konsensual prej Vetëvendosjes për kryetar/e të Kuvendit.
Në deklarimin e tij në Facebook, ai ka dhënë edhe dy shpjegime se pse VV s’po bën kompromis, duke përmendur si të parin shembull mungesën e dëshirës me projektu dobësi para publikut.
Si shpjegim të dytë, ai tha se mund të jetë që ‘’ka qenë një zhagitje e qëllimshme’’ për të mos lejuar konstituimin.
“Ish-opozita po tregohet më se korrekte dhe e gatshme me e votu një emër më konsensual prej VV. AAK madje po i bën publik emrat e pranueshëm. PDK e ka si kriter të mos qenit ministër në mandatin e kaluar. Ku është problemi me u ulë e me diskutu këtë punë me ta? I pari shpjegim është mungesa e dëshirës me projektu dobësi para publikut dhe me e pranu se rezultati i zgjedhjeve në fakt paska qenë një fitore relative që imponon konsensus. I dyti shpjegim – dhe më i mundshmi që tani po duket edhe më qartë – është se e gjithë kjo dramë disa muajshe, që e detyroi edhe ndërhyrjen e gjykatës, ka qenë një zhagitje e qëllimshme për të mos e lejuar konstituimin e kuvendit dhe fillimin e afateve ligjore për formimin të qeverisë”, ka shkruar ai.
