Kampioni i botës në peshat e rënda, Oleksandr Usyk, është parë në prapaskenë në dhomën e zhveshjes së Wembley Stadium, duke lexuar libra fetarë para revanshit të shumëpritur ndaj britanikut Daniel Dubois, që zhvillohet sonte dhe transmetohet në DAZN.

Ky duel është vendimtar jo vetëm për titujt e mëdhenj – përfshirë atë të “Ring Magazine” dhe të padiskutueshmit në peshën e rëndë – por edhe për të ardhmen e Usykut në boks. 37-vjeçari ukrainas ka lënë të hapur mundësinë që kjo të jetë ndeshja e fundit në karrierën e tij të lavdishme, transmeton lajmi.net

Atmosfera para përballjes është elektrizuese, ndërsa Usyk, i njohur për përkushtimin shpirtëror, ka zgjedhur të qetësojë mendjen me lexim fetar, një ritual që e ndjek shpesh para ndeshjeve të mëdha.

Ndërkohë, kundërshtari i tij, Daniel Dubois, ka mbërritur gjithashtu në stadium dhe është në formë të shkëlqyer. Britaniku me 22 fitore, prej të cilave 21 me nokaut, kërkon të korrigjojë humbjen e parë dhe të fitojë titullin e shumëpritur.

Usyk ka vendosur të lëshojë titullin IBF për t’i hapur rrugë këtij revanshi, duke dëshmuar edhe një herë dëshirën për drejtësi dhe garë të ndershme në boks. Sonte, Wembley pritet të jetë skenë e një beteje historike që mund të përmbyllë një epokë dhe të hapë një tjetër në peshën e rëndë./lajmi.net/