Sot i jepet lamtumira e fundit 3-vjeçarit që humbi jetën pasi u godit nga vetura në Ferizaj

Lajme

23/06/2025 13:20

Sot, në varrezat e fshatit Mirosalë të Ferizajt do të varroset vogëlushi 3 vjeçar i cili ka humbur jetën mbrëmë pasi u godit nga vetura nga një familjar i tij.

Në lidhje me këtë ka njoftuar një faqe zyrtare e fshatit Mirosalë të Ferizajt përmes një postimi në Facebook.

“Me dhimbje të thellë ju njoftojmë se djali i Behar Bytyqit ka ndërruar jetë tragjikisht një engjëll i vogël. Varrimi i fëmijës do të bëhet sot në ora 18:00 në varrezat e fshatit Mirosale Ngushëllime familjes, Zoti ju dhashtë forcë në këtë dhimbje të madhe”, thuhet në njoftim.

Lajmin për vdekjen e tij e ka konfirmuar sot për lajmi.net zëdhënësi i Policisë së Kosovës në Ferizaj, Kanun Veseli.

Sipas tij fëmija është goditur nga një veturë në fshatin Dardani në oborrin e shtëpisë, derisa ngasësi i makinës ka lidhje familjare me viktimën.

“Me datën 22.06.2025 rreth orës 18:35, nga stacioni policor në Viti jemi njoftuar se në ambulancën e fshatit Pozheran është dërguar një fëmijë rreth moshës 4-vjeç, i cili është konstatuar pa shenja jete nga mjeku kujdestar. Dyshohet se fëmija është goditur nga një veturë në fshatin Dardani, në oborrin e shtëpisë, ndërsa ngasësi – ka lidhje familjare me viktimën”,tha për lajmi.net Veseli.

I dyshuari është shoqëruar në stacionin policor në Ferizaj, ndërsa në vendin e ngjarjes kanë dalë njësitet përkatëse policore për të ekzaminuar vendin.

“Për të gjitha veprimet policore është njoftuar prokurori i shtetit, i cili ka urdhëruar inicimin e rastit “Shkaktim i rrezikut të përgjithshëm” dhe ngasësi i veturës është ndaluar në mbajtje për 48 orë”.