Besiktasi ka filluar operacionet e transferimeve. Bardhezinjtë duan të shtojnë një qendërsulmues në skuadër dhe tani kanë në agjendën e tyre, sulmuesin e Kosovës, Vedat Muriqi, i cili la gjurmë në Superligën e Turqisë me fanellën e Fenerbahces në të kaluarën.

Qendërsulmuesi prizrenas me përvojë, i cili është një nga emrat e rëndësishëm të ekipit spanjoll, Mallorca, ka një shans për t’u rikthyer në Superligën e Turqisë me një vendim surprizë pas saktësisht pesë sezonesh.

Besiktasi, që dëshiron të ndërtojë një skuadër ambicioze për sezonin e ardhshëm thuhet se ka përveshur mëngët për një transferim të një qendërsulmuesi dhe Muriqi është bërë pjesë e agjendës së tyre, pasi pritet të ndajnë rrugët me Semih Kilicsoy dhe Ciro Immobile.

Sipas mediumit turk Aksam, Besiktas po përgatitet të bëjë një lëvizje për Muriqin, i cili e njeh mirë kampionatin turk dhe është i prirur për lojën në grup.

Ky medium shton se prizrenasi është i etur të luajë përsëri në Superligën e Turqisë, pasi kishte thënë më parë në një intervistë se mund të vlerësonte ofertat që vijnë nga ky vend.

Ndërsa Besiktasi pritet të përshpejtojë përpjekjet e tij në ditët në vijim, parashikohet që transferimi mund të përfundojë rreth 5 milionë euro.

Ndryshe, sulmuesi 31-vjeçar ka luajtur gjithsej në 118 ndeshje me Mallorcën për tri sezone e gjysmë dhe ka shënuar 35 gola dhe 11 asistime.

Te Besiktasi, Muriqi do t’i gjente dy yje tjerë shqiptar: Milot Rashicën dhe Ernest Muçin.