Kombëtarja e femrave të Kosovës në futboll ka filluar me përgatitjet para ndeshjeve të radhës në Ligën e Kombeve.

Në një prononcim për FFK-në, trajneri i kombëtares së femrave, Sami Sermaxhaj ka thënë se ndeshja kundër Letonisë është vendimtare.

“Kemi bërë 2 ditë stërvitje ditore. Nesër do të kemi grumbullimin, ku do të arrijnë edhe lojtaret që janë nga jashtë. Arsyeja pse e kemi bërë kështu ndaras është për shkak se shumica e lojtarëve, sidomos këto që janë në ligën e Turqisë kanë 25 ditë që kanë përfunduar kampionatin dhe ideja është që me këtë 2 ditë stërvitje t’i rikthejmë sa më shpejtë në ritmin e lojës.”

“Lojën testuese me Dukagjinin do provojmë diçka që mund të na shërbej për ndeshjen kundër Letonisë. Ndeshja vendimtare do të jetë Letoni-Kosovë, do të jetë një lojë shumë interesante, mezi s’po presë unë, po besoj edhe vajzat, që me u sfidu me kësi sfida interesante.”, tha Sermaxhaj.

Tashmë Sermaxhaj ka bërë publike listën e të ftuarve për ndeshjen kundër Letonisë.

Dardanet do të takohen me Letoninë, me 3 qershor, në stadiumin “LNK Sporta Parks” në Riga.