Bordi i Asociacionit të Komunave të Kosovës (AKK) ka reaguar ashpër ndaj një deklarate të Ministrisë së Administrimit të Pushtetit Lokal (MAPL), duke e cilësuar atë si shpifëse, denigruese dhe joetike.

Nga AAK kjo deklaratë është konsideruar si sulm institucional ndaj drejtorit ekzekutiv Sazan Ibrahimi dhe një përpjekje për të shmangur përgjegjësinë për fatin e Grantit të Performancës Komunale.

Sipas AKK-së, mosqartësimi nga ana e MAPL-së për aplikimin në fondet IPA III 2025–2027 rrezikon deri në 15 milionë euro të mbështetjes nga Bashkimi Evropian për komunat. AKK kërkon tërheqjen e gjuhës fyese nga MAPL, kërkim falje publike dhe kthim në bashkëpunim institucional, ndërsa alarmon partnerët ndërkombëtarë për ndikimet e mundshme negative në transparencën dhe llogaridhënien komunale.

“Në vend të një përgjigjeje profesionale dhe substanciale ndaj kërkesës zyrtare të parashtruar nga Kryetari i AKK-së, z. Agim Aliu, më 5 maj 2025, ku kërkohet sqarim për aplikimin dhe fatin e fondeve nga thirrja e IPA III 2025–2027 “EU for Good Governance” – MAPL ka zgjedhur të sulmojë personalisht z. Ibrahimi, duke i atribuar qëndrimet e Bordit të AKK-së si “interesa personale” dhe duke aluduar në motive të ulta që bien ndesh me etikën e komunikimit institucional dhe me respektin ndaj përfaqësuesve të 38 komunave të vendit”,thuhet në reagim./Lajmi.net/