Deputeti i Lidhjes Demokratike të Kosovës, Paris Guri ka reaguar në lidhje me anëtarësimin e avokatit Gazmend Halilaj në partinë Guxo.

Guri ka përmendur rastin me të cilin ishte ngarkuar Halilaj- saktësisht dhunimi i vajzës së mitur nga Drenasi.

“Besoj që të gjithëve ju kujtohet rasti monstruoz i dhunimit të vajzës së mitur nga Drenasi. Fillimisht e dhunoi arsimtari; kur ajo e raportoi në polici, e dhunoi polici; e në fund, prokuroria ia zbuloi bisedat edhe avokatit të saj” – ka shkruar Guri.

Gjithashtu deputeti Guri tha se Faton Peci dhe Donika Gërvalla e pritën me nderime të larta në parti Halilajn.

“Dje, Faton Peci dhe Donika Gërvalla e pritën të njëjtin me nderime të larta në parti. Imagjinoni si ndihet sot viktima, kur sheh që dy ministra të Republikës së Kosovës e quajnë atë ‘guximtar’. Për çfarë guximi e keni fjalën?!”. /Lajmi.net/