Pas interesimit të raportuar nga Manchester City, tashmë edhe Manchester United është futur në garë për të transferuar portierin e Paris Saint-Germain dhe Italisë, Gianluigi Donnarumma.

Ish-portieri i Milanit ishte një ndër heronjtë e PSG-së në gjysmëfinalen e Ligës së Kampionëve ndaj Arsenalit, duke bërë disa pritje vendimtare që e çuan skuadrën franceze në finalen kundër Interit më 31 maj.

Klube të shumta në garë për Donnarummën.

Donnarumma, i cili u bashkua me PSG-në si agjent i lirë në vitin 2021, ka kontratë deri në qershor 2026, por raportet nga TEAMtalk dhe Fichajes sugjerojnë se një largim i mundshëm verën e ardhshme është në horizont.

Manchester City ka shprehur interes më herët.

Juventus dhe Inter kanë qenë gjithashtu në listën e klubeve që po ndjekin situatën.

Së fundmi, trajneri Ruben Amorim i Manchester United thuhet se ka kërkuar nga drejtuesit e klubit të bëjnë një ofertë prej rreth 60 milionë euro për gardianin italian.

Kjo shumë do të përfaqësonte një fitim të madh për PSG-në, duke qenë se portieri u transferua falas nga Milan.

Megjithatë, mbetet për t’u parë nëse Donnarumma do të jetë i gatshëm të pranojë një transferim në Premier League, në një kohë kur interesimi për të është më i lartë se kurrë.