Donald Trump shtyn bllokimin e TikTok në SHBA, duke i dhënë kohë kompanisë për të shitur aksionet në tregun amerikan.

Ai njoftoi se do të nënshkruante një urdhër ekzekutiv për të shtyrë mbylljen e platformës TikTok në SHBA për 75 ditë të tjera. Ky vendim i jep më shumë kohë administratës amerikane për të gjetur një pronar të ri amerikan.

Urdhri u shpall ndërkohë që zyrtarët e Shtëpisë së Bardhë besonin se ishin pranë një marrëveshjeje që do t’i jepte një pjesë të aksioneve të TikTok bizneseve amerikane. Pronarët aktualë të TikTok do të mbanin një pjesë të vogël të aksioneve.

Megjithatë, duket se marrëveshja u hodh në erë në minutat e fundit. Përfaqësues të TikTok kontaktuan Shtëpinë e Bardhë gjatë ditës së enjte për të informuar se Kina nuk do ta miratonte më marrëveshjen, pasi Trump kishte urdhëruar vendosjen e tarifave kundër qeverisë kineze.

Kongresi amerikan kishte kërkuar që platforma të shkëputej nga Kina deri më 19 janar ose të ndalohej në SHBA për arsye sigurie kombëtare. Megjithatë, Trump veproi në mënyrë të njëanshme dhe zgjati afatin deri më 5 prill, duke u përpjekur të negociojë një marrëveshje për të mbajtur TikTok në funksion.

Së fundmi, Trump kishte shqyrtuar disa oferta nga biznese amerikane që kërkonin të blinin pjesë nga kjo platformë e njohur e rrjeteve sociale.

Një zëdhënës i TikTok konfirmoi në një deklaratë se kompania ka qenë duke diskutuar një “zgjidhje të mundshme” me qeverinë amerikane, por theksoi se “ende nuk është nënshkruar asnjë marrëveshje.”