Instituti Hidrometeorologjik bën të ditur se sot në Kosovë parashikohet mot i vranët dhe me intervale me diell.

IHK njofton se vranësirat Vende-vende parashihen të sjellin riga shiu.

Temperaturat minimale do të lëvizin nga 3°C deri në 6°C, ndërsa ato maksimale nga 12°C deri në 16°C.

Era do të fryjë nga verilindja me shpejtësi 1-4 m/s.

Ndryshe, Instituti Hidrometeorologjik i Kosovës (IHK) ka lëshuar një njoftim për situatën e krijuar nga reshjet e shiut të intensitetit të ulët deri mesatar, të cilat kanë shkaktuar ngritje të niveleve të lumenjve, veçanërisht në zonat malore. IHK ka bërë thirrje për vëmendje të shtuar, pasi mund të shkaktohen përmbytje në disa zona.

Sipas IHK-së, “reshjet e shiut të cilat në disa zona të vendit kanë qenë me intensitet nga i ulët deri mesatarë dhe me kohëzgjatje relativisht të gjatë, kanë shkaktuar ngritje të niveleve nëpër disa lumenj, sidomos atyre me karakter malor.”

Situata më e rënduar është vërejtur në Pellgun e Lepencit, Moravën e Binçës, Bistricën e Pejës, Bistricën e Prizrenit dhe Bistricën e Deçanit, ku nivelet e ujit janë në ngritje dhe mund të shkaktojnë përmbytje.

“Aktualisht zonat më të rrezikuara janë: vendbanime të Hanit të Elezit, Kaçanikut, Dragashit, Pejës, Deçanit, pastaj në pellgun e Moravës së Binçës”, thotë IHK.

Reshjet e shiut pritet të vazhdojnë edhe gjatë ditëve në vijim.

“Këtë e vështirëson akoma më shumë, reshjet e shiut të cilat pritet të bien gjatë orëve dhe ditëve në vazhdim, Kjo mund të shkaktojë vërshime të shpejta në disa zona”.

Për këtë arsye, IHK rekomandon kujdes të shtuar në zonat e lartpërmendura dhe njofton se do të vazhdojnë të mbajnë qytetarët të informuar për zhvillimet e mëtejshme.