Asociacioni i Gazetarëve të Kosovës ka dënuar sulmet e përsëritura të kryeministrit Albin Kurti ndaj mediave.

Kurti edhe sot nga Gjilani ka sulmuar sërish mediat, duke i quajtur si “portale të oligarkëve”.

Në lidhje me këtë nga AGK-ja kanë dënuar gjuhën e kryeministrit Kurti duke ritheksuar se një retorikë e tillë është e papranueshme dhe rrezikon qytetarët dhe mediat.

Postimi i plotë:

Kryeministri në detyrë dhe kryetari i Lëvizjes Vetëvendosje, Albin Kurti, ka vazhduar edhe këtë të martë sulmet ndaj mediave.

“Gjykimi im është se Prokuroria është më e interesuar të mbushë ballinat e ndonjë portali të oligarkut sesa të sjellë drejtësi,” ka deklaruar Kurti në Gjilan. Këtë deklaratë e ka bërë kur është pyetur nga gazetarët për mosparaqitjen e tij si dëshmitar në rastin e Rezervave Shtetërore, intervistë e caktuar për orën 10:00.

AGK-ja e dënon këtë gjuhë të Kryeministrit në detyrë dhe rithekson se një retorikë e tillë është e papranueshme, rrezikon gazetarët dhe mediet, si dhe minon lirinë e medias dhe shprehjes në Kosovë./Lajmi.net/