Në Turqi janë arrestuar nëntë persona, përfshirë pronarin e hotelit, në lidhje me një zjarr vdekjeprurës që mori jetën e 76 personave dhe plagosi dhjetëra në një vendskijimi  në Turqinë perëndimore.

Ministri i Brendshëm turk, Ali Yerlikaya ka thënë se trupat e 45 viktimave  i janë dorëzuar familjeve të tyre, ndërsa testet e ADN-së po kryhen për të identifikuar trupat e mbetur në Institutin e Mjekësisë Ligjore.

Zjarri ka rënë në një hotel në vendpushimin e skijimit në Kartalkaya në malet Bolu.

Hoteli 12-katësh, i cili kishte 238 mysafirë të regjistruar, u dogj nga flakët pasi zjarri filloi në katin e restorantit rreth orës 3:30 të mëngjesit. Të mbijetuarit përshkruan skena paniku teksa iknin nëpër korridoret e mbushura me tym dhe u hodhën nga dritaret për të shpëtuar.

Autoritetet po përballen me kritika në rritje për masat e sigurisë së hotelit, pasi të mbijetuarit raportuan se asnjë alarm zjarri nuk u ndez gjatë incidentit.

Presidenti  turk Recep Tayyip Erdogan shpalli të mërkurën ditë zie kombëtare pas tragjedisë, e cila ndodhi gjatë pikut të sezonit të turizmit dimëror, me shumë familje nga Stambolli dhe Ankaraja që udhëtonin drejt maleve Bolu për skijim.