Ministria për Marrëdhënie Ndërkomunitare në Maqedoninë e Veriut ka publikuar një komunikatë për media në lidhje me pjesëmarrjen e zëvendëskryeministrit maqedonas Ivan Stoilkoviç në kampin e sportit “Serbia të thërret ty”, i mbajtur mes datave 1-11.08.2024 në Serbi.

Në këtë njoftim, kjo Ministri i është referuar Kosovës me termin “Kosovë e Metohi” ashtu siç i referohen ende serbët dhe Serbia zyrtare që vazhdon të mos e njoh Kosovës dhe të mos e pranojë realitetin e një shteti të pavarur dhe demokratik.

Kjo komunikatë vazhdon të jetë e publikuar në web-faqen e Ministrisë, ndonëse Ministria e Punëve të Jashtme dhe Diasporës e Qeverisë së Republikës së Kosovës thotë se kanë shprehur verbalisht indinjatën për këtë referim të Kosovës, shkruan lajmi.net.

Gjithashtu nga MPJD u tha se Republika e Kosovës mbetet e përkushtuar për bashkëpunim të hapur ndër-shtetëror me Maqedoninë e Veriut, duke kontribuar në paqen dhe stabilitetin në rajon.

Për postimin nga zëvendëskryeministri dhe ministri për Marrëdhënie Ndërkomunitare, Ivan Stoilkovic, zëvendëskryeministri i parë Izet Mexhiti ka thënë se është votuar për interpelancë ndaj tij.

“Ne nuk e mohojmë se Stolkovic-i është përfaqësues i serbëve dhe nuk pretendojmë ta bëjmë shqiptar e as të mendojë si ne. Takimi i parë i Kryeministrit Mickovski ka qenë me Kryeministrin Kurti. Takimi i parë i përbashkët i kësaj Qeverie ka qenë me Qeverinë e Republikës së Kosovës në Prishitinë, kështu që nuk mund të vemë paralele në mes të Stoilkoviçit dhe politikave të Qeverisë për Open Balkanin apo kundër Open Balkanit” – ka deklaruar Mexhiti.

Republika e Maqedonisë së Veriut e ka pranuar shtetin e Kosovës dhe pavarësinë e saj me 09.10.2008 vetëm 8 muaj pasi u shpall pavarësia e Kosovës. /Lajmi.net/