Një person në Pejë është dërguar në mbajtje pasi që pas disa të shtënave me armë zjarri ai është parë në ballkonin e banesës kolektive duke eksozuar armën.

Policia ka njoftuar se i dyshuari ka refuzuar t’i bindet urdhrave të zyrtarëve policorë duke i kanosur ata por më pas është qetësuar dhe arrestuar, shkruan lajmi.net.

Gjatë kontrollit të Policisë, atij i janë gjetur një pushkë automatike, një pistoletë, dy karikatorë, 71 copë fishekë,  pesë gëzhoja, dhe një thikë-bajonetë.

Me vendim të prokurorit, pas intervistimit ai është dërguar në mbajtje.

“Pejë / 14.01.2025-21:42. Pas disa të shtënave me armë zjarri i dyshuari mashkull kosovar është vërejtur në ballkonin e banesës kolektive duke  ekspozuar armën. I njëjti  fillimisht ka refuzuar tu bindet urdhrave të zyrtarëve policor  duke ju drejtuar me kanosje. Më vonë i njëjti është qetësuar dhe arrestuar. Gjatë kontrollit  në banesën e tij janë gjetur dhe konfiskuar:  një pushkë automatike, një pistoletë, dy karikatorë, 71 copë fishekë,  pesë gëzhoja, dhe një thikë-bajonetë. I dyshuari pas intervistimit me vendim të prokurorit është dërguar në mbajtje”, thuhet në raportin 24 orësh të Policisë. /Lajmi.net/