Komuna e Obiliqit ka nxjerrë një urdhëresë për ndalimin e përdorimit të mjeteve piroteknike.

Kryetari i Komunës së Obiliqit, Xhafer Gashi, nxori urdhëresën për ndalimin e përdorimit të mjeteve piroteknike në vende të hapura publike, përkatësisht në tregje, rrugë dhe sheshe.

“Ndalimi i përdorimit të mjeteve piroteknike bëhet me qëllim të sigurisë së qytetarëve, mbrojtjes së cilësisë së ajrit dhe mjedisit, si dhe për mbrojtjen e shëndetit të popullatës”, thuhet në njoftimin  e bërë nga komuna e Obiliqit.

Ndryshe, Ministria e Punëve të Brendshme (MPB) ka bërë thirrje për respektimin e ligjit dhe ka njoftuar qytetarët se përdorimi i mjeteve piroteknike është i ndaluar deri më 26 dhjetor.

“Përdorimi i mjeteve piroteknike është i lejuar vetëm pas datës 26 dhjetor. Shkelja mund të sjellë gjoba deri në 500€. Siguria është përgjegjësia jonë e përbashkët”, thuhet në njoftimin e MPB-së.