“Babë ma kanë vra mësuesin”, i citon fjalët e djalit të tij, Bejt Geci, 27 vjet pas vrasjes së Halit Gecit, në Llaushë të Drenicës.

Si sot, në nëntorin e vitit 1997, djali i tij kishte shkuar në shtëpi i përlotur duke i treguar familjes se e ka humbur mësuesin.

Halit Geci ishte vrarë më 26 nëntor derisa qëndronte brenda objektit të shkollës së fshatit – aty ku jepte mësim.

Forcat serbe kishte gjuajtur në drejtim të shkollës, pa asnjë provokim.

Bashkëvendësit e mësuesit, si Bejt Geci, e përshkruajnë atë si njeri i urtë e i zgjuar.

“Mësuesi Halit ka qenë një mësues i shkëlqyeshëm, jo vetëm në fshat, por në pak vende ka pas [të tillë]. Ka qenë njeri u urtë, i zgjuar, asnjë vërejtje nuk e ka pasur. Djali im ka qenë nxënësi i tij, kur ka ndodhur vrasja e tij djali ka ardhur tek shtëpia duke qajtur tha ‘Babë ma kanë vra mësuesin’. Të gjithë kemi qenë të mërzitur sepse ka qenë një mësuesi i dalluar në shkollën tonë”, thotë Geci.

Në rrëfim, Geci tregon se si kishe rrjedhur ngjarja deri tek vrasja e mësuesit, varrimi i të cilit ishte bërë më 28 nëntor.

Po atë ditë, në ceremoninë e varrimit, Ushtria Çlirimtare e Kosovës kishte dalë për herë të parë publikisht.

Geci thotë se pas sulmit ndaj komandantit Abedin Rexha në fshatin Vajnikë të Skenderajt, një ditë më vonë serbët ishin përballur me forcat e UÇK-së, ku edhe kishin pësuar humbje.

Sipas tij, “nga mllefi që disa ushtarë serbë janë vrarë e plagosur atje”, forcat serbe kanë gjuajtur nëpër shtëpi e shkollë.

“Pasi kanë zënë pritat në [malin] Klysyr, në lagjen ‘Rezallë e Re’ aty i kanë zënë pritat disa grupe. Kur forcat serbe të shkojnë për Vajnikë tek Abedin Rexha-Sandokani. Aty në Klysyr janë përballë me forcat e UÇK-së, aty pas humbjeve që i kanë pasur unë i kam parë me sy të mijë tenkat e shkatërruara që kanë ardhur për Skenderaj, siç flitet unë i kam parë më sytë e mi ushtarët e UÇK-së që kanë marrë fishekë me sanak. Aty pas humbjes së madhe që e kanë pasur në Rezallën e Re, forcat serbe kanë dalë të humbur, të vrarë e të plagosur. Nga mllefi që kanë pasur humbje të mëdha, duke ardhur për Skenderaj kanë gjuajtur në shtëpi, ku kanë mundur. Mësuesi Halit ka qenë në shkollë, e kanë gjuajtur edhe shkollën. Në atë rast mësuesi është plagosur, si dhe mësuesi Shaban Rreci…Duke e çuar për spital mësuesi Halit ka ndërruar jetë”, rrëfen Geci.

Ndër të tjera, Geci tregon se banorët nuk kanë ditur se pikërisht në varrimin e Halit Gecit do të dalë për herë të parë publikisht UÇK-ja.

“Pas dy ditë me 28 nëntor e ka lënë komandanti Adem Jashari me shokë të tij ta varrosin mësuesin Halit dhe ta shpallin Ushtrinë Çlirimtare të Kosovës…Jo nuk e kemi ditur [që do të dalë UÇK]. Varrimin e mësuesit Halit e kanë lënë me 28 nëntor, e kanë vonuar pak, për shkak se ka qenë edhe Dita e Flamurit”, thotë ai.

Mijëra njerëz ishin mbledhur në varrimin e mësuesit, por pa e ditur se aty po shënohej historia.

Varrimi i mësuesit Halit Geci dhe dalja e parë publike e UÇK-së shënojnë një prej ngjarjeve kryesore të historisë së lavdishme të popullit shqiptar për çlirim.

Deklarata e UÇK-së ishte lexuar nga Rexhep Selimi i cili shoqërohej nga dy ushtarë të tjerë, Daut Haradinaj dhe Mujë Krasniqi.

Sot, pranë shkollës në Llaushë qëndron përmendorja e mësuesit Halit Geci dhe shkolla e fshatit mban emrin e tij.

Ndërkaq në hapësirën ku ishte paraqitur UÇK-ja, sot është përuruar një memorial kushtuar asaj ngjarjeje.