Tentim-grabitje në një market në Ferizaj, prangosen dy të mitur
Policia e Kosovës ka njoftuar se sot në orët e hershme të mëngjesit, rreth orës 03:26 kanë pranuar një informatë se në një market në rrugën ‘’Ramadan Rexhepi” në Ferizaj është një tentim grabitje në progres nga dy persona. Në njoftimin e Policisë thuhet se të menjëhershëm në reagim kanë qenë patrullat e policisë, të…
Lajme
Policia e Kosovës ka njoftuar se sot në orët e hershme të mëngjesit, rreth orës 03:26 kanë pranuar një informatë se në një market në rrugën ‘’Ramadan Rexhepi” në Ferizaj është një tentim grabitje në progres nga dy persona.
Në njoftimin e Policisë thuhet se të menjëhershëm në reagim kanë qenë patrullat e policisë, të cilët kanë arrestuar të dyshuarit.
“Nga hetimet e para është mësuar se dy persona, meshkuj, njëri me armë (pistoletë) kanë hyrë në market dhe nën kërcënim të armës kanë tentuar të kryejnë grabitje, mirëpo kanë hasur në rezistencë dhe janë ndaluar nga dy pronarët e marketit, të cilët kanë arritur t’ia largojnë pistoletën nga dora, e në ndërkohë kanë arritur policët e rendit të stacionit të Ferizajt, të cilët i kanë arrestuar dhe shoqëruar në stacionin e policisë në Ferizaj, ndërsa si provë materiale kanë sekuestruar edhe armën (imitim i pistoletës së zjarrit), e cila dyshohet se është përdorur gjatë tentim grabitjes”, thuhet në njoftim.
Tutje në rast janë kyçur edhe hetuesit rajonal, të cilët nën autorizim të prokurorit të shtetit i kanë marrë të gjitha masat e nevojshme për hetimin e rastit.
Ndërkaq të dyshuarit meshkuj, të moshave 16 vjeçar dhe 15 vjeçar, në prezencë të avokatit mbrojtës me detyrë zyrtare dhe zyrtarit të Qendrës për Punë Sociale janë intervistuar nga hetuesit rajonal, ndërsa me vendim të prokurorit të shtetit janë ndaluar në mbajtje për 24 orë, për procedura të mëtejme hetimore. /Lajmi.net/
