Debati që ngjalli shumë reagime për dy ditë radhazi brenda Kuvendit dhe jashtë tij për doracakët e lëndës “Edukimi Seksual”, përfundoi duke thënë se të njëjtët “nuk janë obligativ”.

Zëvendësministri, Tualant Kelmendi, reagoi ndaj debatit të krijuar duke iu referuar si manipulim e të pavërteta.

Kelmendi shkroi po ashtu se doracakët “nuk janë obligativ”.

Por që nëse kthehemi pakëz mbrapa, jo më larg se tetorin e vitit të kaluar pikërisht puna për krijimin e këtyre doracakëve ishte përgëzuar nga e para e ministrisë së Arsimit, Arbërie Nagavci.

Gjatë një vizite në gjimnazin “Sami Frashëri”, në kuadër të Javës së promovimit të shëndetit në shkolla, Nagavci kishte vlerësuar se tema e edukatës seksuale në shkolla është tejet e rëndësishme dhe se sipas saj fëmijët dhe adoleshentët meritojnë të kenë informata të sakta në aspektin mjekësor, shkencor, fiziologjik dhe psikologjik.

“Mirëmbajtja e shëndetit është pjesa më qenësore e jetës sonë, ku shëndeti i fëmijëve dhe të rinjve tanë ka vend të veçantë. Në Kosovë edukimi gjithëpërfshirës seksual është pjesë përbërëse e Kornizës së Kurrikulës së Kosovës” – ishte shprehur ministrja Nagavci.

Veçmas kësaj, në komunikatën për media të ministrisë u tha se MAShTI është ministria e parë në rajon që me sukses e ka trajtuar çështjen e edukimit seksual dhe e ka futur si lëndë mësimore në shkolla, prandaj edhe po merret si model në rajon.

“Ministrja Nagavci ka përgëzuar grupin punues ndërsektorial dhe UNFPA-n, për hartimin e 3 doracakëve ndihmës për mësimdhënës për nivelin 1-5, nivelin 6-9, si dhe nivelin 10-12, duke shtuar se, Ministria e Arsimit mbetet e përkushtuar për ruajtjen dhe përparimin e shëndetit të fëmijëve në institucionet arsimore. Shefja e UNFPA-së, Visare Mujko Nimani ka thënë se, MAShTI është ministria e parë në rajon që me sukses e ka trajtuar çështjen e edukimit seksual dhe e ka futur si lëndë mësimore në shkolla, prandaj edhe po merret si model në rajon”, thuhet ndër të tjera në njoftimin e MAShTI-t./Lajmi.net