Ministria e Drejtësisë ka dhënë tender në vlerë afro 815 mijë euro për renovimin e objektit të Mjekësisë Ligjore që u përfshi nga zjarri dy herë gjatë vitit të kaluar.

Në këtë tender përfshihet renovimi i kulmit dhe rikonstruksioni i hapësirave të brendshme në objektin e Institutit të Mjekësisë Ligjore.

Në njoftimin për dhënie të kontratës të publikuar në faqen e Komisionit Rregullativ të Prokurimit Publik thuhet se përmes kësaj kontrate parashihet të bëhet renovimi i objektit, funksionalizimi i laboratorit dhe përmirësimi i kushteve të punës për gjithë stafin e Institutit.

Kontrata është dhënë me procedurë të hapur, e vlera e përgjithshme e saj është 814 mijë e 229 euro e 72 centë.

Nënshkrimi i kontratës është planifikuar të bëhet nesër. Punimet do t’i kryejë “MBB Construction SH.P.K”.

“Çdo palë e interesuar mund të bëjë ankesë pranë Autoritetit Kontraktues në bazë të nenit 108/A te ligjit Nr. 04/L-042 për Prokurimin Publik të Republikës se Kosovës, i ndryshuar dhe plotësuar me ligjin Nr. 04/L-237, ligjin Nr. 05/L-068 dhe ligjin Nr. 05/L-092 ne adresën e specifikuar ne Nenin I te këtij Njoftimi për dhënie te kontratës”, thuhet në njoftim.